Besnik Aliaj

Besnik Aliaj është arkitekt-urbanist me formim universitar (UT Tiranë). Ai ka kryer më pas studime pasuniversitare për: vlerësimin e pasurive të patundshme (Shqipëri); çështje kulturore të arkitekturës dhe territorit (Danimarkë/Norvegji); si dhe çështje të planifikimit dhe mjedisit (SHBA). Ka kryer studime Master në çështje të planifikimit dhe menaxhimit urban (Erasmus University, Rotterdam, Holandë), si dhe Doktoraturën (UPT Tiranë). Pranë këtij të fundit ka marrë edhe titullin akademik “Profesor”, pas një përvoje pune 15-vjeçare atje.

Besnik Aliaj ka një përvojë të pasur profesionale në administratën lokale dhe qendrore, dhe sidomos në sektorin jo-qeveritar. Ai është bashkëthemelues i studios së arkitekturës – urbanistikës Metropolis shpk; i institutit jo-qeveritar profesional Co-Plan, dhe Universitetit Polis në Tiranë. Fusha e tij e interesit është planifikimi gjithëpërfshirës dhe zhvillimi i qëndrueshëm i territorit, por ai ka një angazhim më holistik përtej kësaj fushe.

Aliaj ka gati 2 dekada përvojë në mësimdhënie edhe në sektorin jo-publik. Është njohës i mirë i sektorit dhe transformimit të arsimit të lartë e kërkimit shkencor në Shqipëri. Aktualisht është rektor i Universitetit Polis. Aliaj ka edhe një angazhim të prekshëm publik dhe qytetar për çështjet e zhvillimit të qytetit dhe shoqërisë, përfshi angazhimin në median e shkruar dhe elektronike, si dhe zgjedhjen 3 herë si anëtar i këshillit bashkiak Tiranë. Është fitues i disa çmimeve dhe njohjeve kombëtare dhe ndërkombëtare.