Deklaratë nga QAA

QAA ka kënaqësinë të përgëzojë Universitetin POLIS për përfundimin me sukses të rishikimit të ndërmjetëm (mid-cycle review) të akreditimit të tij ndërkombëtar.

Universitetit POLIS iu dha për herë të parë akreditimi ndërkombëtar (Global Accreditation) nga QAA në mars të vitit 2023. Ky akreditim u jepet institucioneve për një periudhë pesëvjeçare, me kusht që të kalojnë me sukses rishikimin e ndërmjetëm. Ekipi i vlerësimit arriti në përfundimin se Universiteti POLIS ka bërë përparim të kënaqshëm që nga Rishikimi Ndërkombëtar i Cilësisë (IQR) i majit 2023 dhe rekomandoi që vlefshmëria e IQR-së të zgjatet deri më 16 dhjetor 2028.

Akreditimi Ndërkombëtar (Global Accreditation) u jepet institucioneve të arsimit të lartë jashtë Mbretërisë së Bashkuar që kanë përfunduar me sukses procesin e International Quality Review (IQR) të QAA-së. Ky proces i vlerëson institucionet në përputhje me standardet ndërkombëtare të sigurimit të cilësisë të përcaktuara në Pjesën 1 të Standardeve dhe Udhëzimeve për Sigurimin e Cilësisë në Hapësirën Evropiane të Arsimit të Lartë (ESG).

Rishikimi i ndërmjetëm konstatoi se:

“Universiteti ka zgjeruar me sukses infrastrukturën e tij akademike përmes blerjes së një ndërtese shtesë, e vendosur brenda kampusit ekzistues. Kjo godinë shërben si një qendër strategjike për Fakultetin e Planifikimit, Menaxhimit dhe Mjedisit Urban, duke ofruar hapësira dukshëm më të mëdha për zhvillimin e veprimtarisë kërkimore-shkencore të institucionit… Institucioni ka arritur një rritje të qëndrueshme të numrit të studentëve. Kjo rritje menaxhohet përmes një qasjeje strategjike dhe organike… POLIS mbetet i përkushtuar për të ruajtur raportin optimal staf–student, duke garantuar nivelin e lartë të mentorimit që është thelbësor për mjediset e tij të të nxënit të bazuara në studio.”

Universiteti POLIS është një institucion jopublik i arsimit të lartë në Shqipëri. Ai u themelua në vitin 2006, ndërsa origjina e tij daton në vitin 1996 me krijimin e Co-PLAN – Instituti për Zhvillimin e Habitatit.

Sam Booth-Malone, Menaxher për Cilësinë dhe Zhvillimin Ndërkombëtar në QAA, u shpreh:

“Është një kënaqësi e veçantë të bashkëpunojmë me Universitetin POLIS dhe me të gjithë kolegët tanë në Shqipëri. Presim me padurim të vazhdojmë këtë marrëdhënie shumë pozitive dhe produktive.”

Raporti i plotë i rishikimit të ndërmjetëm është i disponueshëm në faqen zyrtare të QAA.